Politika e Jashtme e BE-së në pushim, Kosovës i mbeten sanksionet

unnamed-file-747

politika-e-jashtme-e-be-se-ne-pushim,-kosoves-i-mbeten-sanksionet

politika-e-jashtme-e-be-se-ne-pushim,-kosoves-i-mbeten-sanksionet

Kosova bëri hapa për ta shtensionuar veriun sipas një marrëveshje të arritur mes Kryenegociatorit Besnik Bislimi dhe Emisarit Miroslav Lajçak , por BE-ja nuk po i konsideron të mjaftueshëm për t’ia hequr sanksionet. Diplomacia e BE-së ka shkuar në pushime me njoftimin se kthehen në fund të gushtit. Edhe Kryenegociatori Besnik Bislimi është i habitur që BE-ja nuk tha asgjë për heqjen e masave siç i quajnë të dyja palët.

Zëdhënësi i Bashkimit Evropian për Politikë të Jashtme njoftoi gazetarët se kryediplomati Joseph Borrell po shkon në pushim dhe do të rishihen në fund të gushtit.

I bie që udhëheqja e politikës së jashtme të BE-së mori pushimin e verës, pa një përgjigje për sanksionet që i janë vënë Kosovës në fund të qershorit, si masë ndëshkuese për Qeverinë që s’pranonte propozimet e BE-së për shtensionimin e situatës në veri.

Me 10 korrik, Kosova arriti një marrëveshje me BE’në në Bratisllavë të Sllovakisë. Në bazë të saj ka filluar largimi i pranisë së njësive speciale nga objektet e komunave veriore, por kjo është duke shkuar ngadalë, pasi në dy javët e parë do të tërhiqen vetëm 25 përqind e tyre. Pas dy javësh do të bëhet një vlerësim i ri nga Policia, EULEX dhe KFOR për t’i tërhequr eventualisht edhe 25 përqind.

Ndonëse ishte thënë se sanksionet ndaj Kosovës ishin të përkohshme, zyrtarët e BE-së, para se të shkonin në pushim, nuk bënë të qartë nëse ato do të largoheshin. Këtë të paqartë e ka edhe kryenegociatori Bislimi.

Pas takimit që pati në Bruksel të mërkurën, ai tha se janë të habitur që Përfaqësuesi i Lartë i Bashkimit Evropian ende nuk ka kërkuar që Kosovës t’i hiqen masat ndëshkuese.

“Në Bratisllavë kemi dakorduar një marrëveshje që quhet aranzhimet mes Kosovës dhe BE-së për implementimin e qëndrimit e 27 vendeve anëtare të BE-së. Rrjedhimisht titulli i asaj marrëveshje tregon që dakordimi ka të bëjë me zbatimin e kërkesave të BE-së dhe i përgjigjet kërkesave të BE-së. Për ne ka qenë e qartë se kjo është rruga për heqjen e masave ndëshkuese ndaj Kosovës. Për ne është habi që edhe 8 ditë pas dakordimit në Bratisllavë ende nuk kemi një letër shpjeguese që kërkon heqjen e masave nga ana e Komisionit dhe Bashkimit Evropian” ka thënë Bislimi.

Me këtë paqartësi të krijuar, udhëheqja e diplomacisë evropiane shkoi në pushime.

Profesori Blerim Latifi, që përcjell zhvillimet politike në vend e ka komentuar cështjen e sanksioneve, të cilat nuk u hoqën as pas marrëveshjes.

“Borrelli paska shkuar në pushimin e gjatë të verës. Kjo do të thotë se edhe Dialogu Kosovë- Serbi shkon në pushim. Me gjasë edhe mekanizmi që vendosë për heqjen e sanksioneve që na u vendosën ditë më parë. Pastaj, me ardhjen e shtatorit, rifillojnë vajtje-ardhjet, tashmë të njohura prej vitesh. Vajtje-ardhjet që prodhojnë shumë zhurmë dhe pak rezultate”, ka shkruar Latifi në Facebook.